不過有個別議員就唔懂得慎用呢筆公帑，竟然連買牙刷都向立法會開數，搞到秘書處要好似教細路咁，發通知詳列有乜嘢開支唔算係醫療開支，依例唔可以向立法會開數，轉個彎警告呢位議員唔好再有下次！

非醫津範圍之內

秘書處尋日向全體議員發出通知，提醒佢哋話，議員嘅醫療津貼只可以用喺住院或門診服務，「以該等服務可以協助議員喺任內保持較佳健康，更好地為市民服務為準」，並列出咗六種唔符合申領條件嘅保費或開支，包括一筆過嘅危疾補償、身故補償、運送投保人遺體嘅費用、住院現金補貼、斷保退保補償、以及眼鏡或隱形眼鏡等非醫療開支。

其實呢啲都係政府同一般大公司申領醫療津貼嘅基本常識，秘書處咁都要鄭重發出通知，九成九係有人違規亂咁開數喇！今屆六十名議員當中，暫時都未聽聞有人身故或患上危疾，住過院嘅勞聯李鳳英同民建聯黃容根，據聞亦冇攞住院現金補貼，最有可能出事嘅估計係非醫療開支一項。經過一番明查暗訪，果然係畀我哋估中，不過就唔係買眼鏡，而係買牙刷，最後當然畀秘書處彈番轉頭。

究竟係邊位議員咁貪得無厭，連買牙刷嘅錢都想開公數呢？我哋問一大輪都暫時未查到，有知情人士就話，為咗保障個人衞生，好多牙醫都會將用嚟教啲病人刷牙嘅牙刷即用即棄，然後喺張收據當係賣咗畀個病人，相信只係有關嘅議員或者佢嘅議員助理冇睇清楚張單，以為成筆都係睇牙費用咁向立法會開數，唔係故意呃公帑。不過如果同類事件係發生喺啲高官身上，相信班議員肯定會發晒癲要求佢道歉辭職，邊理得你係無心之失定係有意呃錢。