豬流感肆虐，衞生署衞生防護中心總監曾浩輝每日下午四點半總會上電視講解豬流感堪稱「430之星」，辛苦到暈。尋日朝早上完電視台，難得忙裏偷閒，曾醫生一身便服打扮，下午兩點幾着住貼身Ｔ恤西褲同全港動漫迷一齊排隊，去動漫電玩節行番夠本。平時西裝骨骨嘅佢，唔係除下西裝，都唔知道佢身形咁Fit，睇怕平時肯定都係做開運動嘅人。
曾醫生行電玩節咁難得，當然要問吓佢買咗咩啦。一問之下，先知道佢攞住成袋嘢，全部唔係買畀自己，佢話都係買畀細路哥喎，聞說曾醫生仲係鑽石王老五，唔知邊個細路哥有幸收到佢嘅禮物呢？曾醫生仲邊行邊展示手上兩件戰利品，一件係手提遊戲機，另一件係迪士尼電影《太空奇兵‧威Ｅ》主角威Ｅ的模型玩具（圖），睇佢笑到見牙唔見眼嘅樣，就知道佢幾咁滿載而歸啦！
《太空奇兵‧威Ｅ》故事講未來世界嘅地球已變成垃圾星球，唔適宜再居住，人類搬咗去外太空，成個地球得番垃圾清理機械人威Ｅ喺度執垃圾，寂寞到死，幸好最終有位神秘女機械人探訪地球，與他展開一段外太空尋找人類之旅，拯救到人類之餘，更奪得美人歸添。
成個故事勵志得嚟又有溫情，唔通劇情同佢自己好相似？唔講唔知道，曾醫生都係動漫迷，平時咩漫畫都會睇，好似愛情、推理類漫畫等，難怪佢要偷閒去逛吓。