唔係講笑啩？亡命小巴已經害人不淺嘞，居然仲有顏面加價？冇錯，世事往往就係咁諷刺，乘客要畀多啲錢去擔驚受怕搭亡命小巴，可以話係貼錢買難受。

實情係咁嘅，死得人多吖嘛，保險公司賠錢賠到手軟，兩宗奪命車禍估計要賠四千五百萬。保險公司當然唔想做蝕本生意，於是乎，小巴保費自自然然就要起勢咁加。加咗保費咯喎，你估會唔會羊毛出在羊身上吖嗱？小巴公司當然都唔想做蝕本生意，於是乎，乘客好大可能成為羊毛供應者，即係被迫接受車費加價嘅羊牯。

唔知大家點諗，功夫茶就覺得非常之咁搵笨。先畀錢你使，再任你加價，結果有可能連條命都畀你攞埋，唉，風水鴨都淨係呃錢啫，原來亡命小巴更加狼死。

有乜辦法避免搵笨呢？最徹底當然係嚴防車禍，千方百計令到小巴司機安全駕駛，唔好掟個彎又衝上巴士站，唔好慢線行車又竟然高速撞車。運輸署本來好天真咁諗，安裝車速顯示器搞得掂喇啩，一超速就嘟嘟聲，司機唔減速，乘客都詐型。事實係點大家有目共睹，嘟嘟聲只不過係小巴超速嘅助興音樂。

比較有實際作用嘅係安裝限速器，一超速就截油，踩爛油門都唔可以狂飆。問題係，一向懶懶閒閒嘅運輸署肯唔肯做嘢呢？嘩，唔講真係唔知，運輸署原來早於○○年已經開始研究小巴安裝限速器，點知拖下又一年，拖下又一年，足足拖咗九年，簡直累街坊。九年以來，到底有幾多人死於亡命小巴車禍？功夫茶想問一問運輸署署長黃志光，你有冇良心㗎？

可能係近排壓力太大啩，運輸署「忽然積極」，終於答應引入限速器，仲話一年之後可以為全數四千三百五十部紅、綠小巴安裝。之不過咁，時速上限未定，仍要諮詢業界。功夫茶有少少擔心，以特區官僚嘅龜速效率，諮詢得嚟咯喎，一年後安裝嘅承諾可能又要落空。

其實，小巴司機點解要亡命飛車呢？歸根究柢係薪酬制度問題，佣金制吖嘛，接客愈多賺錢愈多，等錢使嘅司機咪搏老命踩多轉囉。要根治司機嘅超速惡習，限速器固然有幫助，不過最大幫助應該係取消佣金制，一律月薪制，超又三十六，唔超又三十六，咁就冇人會超速嘞。

唔該黃志光署長醒少少，順手諮詢業界取消佣金制，否則即使有咗限速器一樣可以死人，你以為時速五十公里衝上巴士站唔會出事咩？霎戇！