旅遊發展局主席田北俊喺去年立法會選舉中敗陣，被迫離開立法會議事堂。中大最新公布嘅民調話，市民畀今屆立法會議員嘅評分唔理想，已經唔係議員嘅田少話都有留意，佢好感慨話：「我唔奇怪選民會失望，因為班直選嘅淨係識批評，但又冇有效改善（施政）方法。」
田少尋日應無綫電視總經理陳志雲邀請，做《志雲飯局》嘉賓，由情史、家族關係講到自由黨、旅發局工作。田少喺錄影前直話直說，談到中大個最新民調。佢話發現傳媒今年少咗報道立法會大會嘅質詢同動議：「唔知係咪議員質素差咗，問問題唔到題，定係冇做足功課……」佢話今屆有雷曼同梁展文事件，絕對唔會缺乏議題，問題出在議員和官員嘅質素和取態上；畫公仔唔使畫出腸，大家都聽得出佢在暗寸立法會。但講到黨友喺立會嘅表現，佢就口下留情話，自由黨由以前十個議員變到依家得三個，分工難免有困難，佢呼籲已另起爐灶組成經濟動力嘅四個前黨友歸隊添！