政府堅持讓正生書院遷入梅窩鄉議局南約區中學，梅窩居民則企硬反對，仲計劃在周日遊行抗議，真係唔知拖到幾時至解決。鄉議局主席劉皇發（圖）和副主席張學明尋日就約咗署理政務司司長、教育局局長孫明揚到香港會食飯，討論正生書院問題。雖然雙方始終傾唔埋欄，但孫公就在飯局後開腔為事件降溫，叫梅窩居民坐低傾掂佢。
卓妮尋日目睹孫公同發叔及張學明前後腳離開香港會，孫公離開時話，大家食飯主要係想研究解決正生書院遷校問題，暫時未有解決方案，但已經有好多人幫手做緊嘢，仲呼籲大家一齊諗吓辦法。對於梅窩居民態度同以前一樣咁強硬，準備周日遊行抗議，孫公就語重心長話：「唔好行咁多啦，大家坐埋傾吓解決事件啦！」
目前鄉議局有幾個大炸彈要拆，除咗正生書院遷校問題外，仲有興建廣深港高鐵涉及嘅收地問題，令身兼行政會議成員嘅發叔左右做人難。
卓妮問發叔會否擔心被炸彈炸親？發叔笑笑口話：「我係拆彈專家，都係幫政府同居民做嘢啫！」發叔大仔劉業強係鄉議局專業事務委員會主席，孭重飛負責拆彈，搞掂深港高鐵呢單嘢。