今屆立法會足球隊相當神勇，連番報捷，隊長林大輝居功不少，皆因多得佢搵猛人外援幫腳。大輝帶領自己隊沙田足球隊都創出神話，事關佢兩年前入主沙田足球隊後，成績一日好過一日，嚟緊九月即將升上甲組，與另一地區球隊和富大埔並駕齊驅。為咗進一步提升球隊質素，大輝諗住物色一至兩個外援幫吓腳，但係並唔會影響原班人馬升班甲組，相當念舊情！
大輝話，現時沙田足球隊班底，全部係升班功臣，佢唔想請其他本地球員返嚟打亂陣腳，搞到隊波要變陣，最好原班人馬由丙組踢上甲組，咁顧及球員感受，唔怪得個個踢得咁落力！大輝除咗管理球隊外，本周五會帶團去曼谷參加亞洲武術運動會，角逐柔道、空手道、泰拳、跆拳道和武術等項目，港協暨奧委會會長霍震霆都會隨行。