施子清今次借出嘅作品，出處係南宋詩人楊萬里嘅《過百家渡四絕句》。佢話中國文字係國寶，一定要練得好，加上現代人打字多過寫字，所以佢擔心將來啲人真係會唔識寫字。

寫得一手好字，自然經常有人敲門索取墨寶，施子清來者不拒，邊個搵佢寫都永無托手㬹，依家佢一個星期寫字兩次，但都係為咗應酬各方友好，搞到教孫仔孫女嘅時間都無，只能假手於其他老師。好彩孫仔孫女都對書法有興趣，施子清話從來唔逼啲孫寫得好，反正書法要時間浸淫嘛！

前日開幕禮上，身為主人家嘅香港教育工作者聯會會長、港區全國人大代表楊耀忠都有出席，佢啱啱隨人大去山西考察返港，激讚山西係文化寶藏，佛寺數目全國之冠，好應該宣傳吓當地旅遊業，可惜佢滿心期待嘅山西刀削麵「削」得滯，令佢有啲失望。