立法會福利事務委員會尋日召開抖暑前最後一場會議，今次亦係Fisher退休前最後一次到立法會出席會議。各黨派議員輪流大讚Fisher肯聽民意、思想開放，又勇於面對群眾，即使上千人嘅地區居民聲討政府大會都未驚過，一人幾句一共讚咗九次咁多，同平日議員狂炳官員嘅情況啱啱相反。

署任無得升 長俸少一橛

議員喺大讚Fisher嘅政績同工作態度之餘，亦對佢官運欠佳抱不平，講講吓仲變咗聲討煲呔曾大會。勞聯李鳳英話Fisher真正做到「攞個心出嚟對人」，唔似某啲人咁淨係得把口講。公民黨梁家傑直言Fisher署任首長級第六級職位三年都未升正，只能以第四級嘅官階退休，退休金同長俸少咗好多，令人質疑煲呔曾自己做唔到「用心為民」，就刻意冷待啲做得到嘅下屬。工聯會王國興就話，如果其他公務員都好似Fisher咁「民心我心」，就唔使嘥咁多公帑請埋咁多問責官員。

對於議員為自己猛戴高帽，一向平實低調嘅Fisher，喺會上完全冇回應，只係好似平時咁耐心解答議員提出嘅政策問題。直至會議結束後，佢先喺傳媒要求下講咗幾句個人感受，話自己為官三十年，忙到連一餐早茶都未飲過，離開政府後一定要補番數。問佢會唔會學有啲退休高官咁下海從商搵真銀？佢就話自己早年立志做學術工作，後來誤打誤撞先入咗政府，退休後考慮執教鞭回饋社會，就算冇錢收都冇所謂，簡直係絕世人辦！

不過多名議員都認為Fisher齋教書有啲嘥料，建議佢效法另外兩名前高官王永平同葉劉淑儀咁，轉做時事評論員或者參選立法會。須知平叔同葉太都係出名嘅「反曾」悍將，最近連前特首辦主任林煥光都不吐不快，炮轟高官無視野、無遠見；如果仲要加多個Fisher，煲呔曾肯定有排瞓唔着！