本文重點
被譽為「最美麗港姐」嘅朱玲玲去年嫁畀「上海姑爺」羅康瑞後，經常人前人後晒恩愛，不時翹住老公手臂逛街High Tea，典型嘅幸福少奶奶。尋日朱玲玲連食晏時間都唔放過，相約老公去灣仔君悅酒店撐枱腳，咁啱得咁蹺，酒店搞緊一個大型座談會，城中大孖沙及多位政協常委等名人雲集，朱玲玲前夫霍震霆都係座上客。可惜朱玲玲比前夫提早半粒鐘離開君悅，朱、霍兩人同場不相見，或許這就是「無緣對面不相逢」吧！
君悅尋日變身政經界派對場地，身兼全國政協常委嘅陳永棋、鄭家純、郭炳湘、李澤鉅、梁振英、楊孫西以及政協李家傑、霍震霆和人大霍震寰等人現身座談會，會議由朝早十點開到十二點四十五分，散場後再喺酒店食飯。
陪老公仔食晏
羅康瑞雖然無份參加座談會，但咁啱又相約太太呢個鐘數喺君悅撐枱腳。兩人食到下午一點半離開，穿上一件火紅色恤衫、戴ＬＶ太陽眼鏡嘅朱玲玲與老公並肩離開，朱玲玲派頭十足，肩上揹着杏啡色Prada名牌手袋，頸上戴上圓圈形碎鑽頸鏈，耀眼到極。
兩人拍拖拍到嚟灣仔，莫非另有原因？非也，羅康瑞同卓妮講，佢寫字樓喺附近（瑞安中心），咁啱太太經過呢頭，咪相約食飯囉。卓妮問朱玲玲幾時為羅康瑞生ＢＢ，戴上鑽石婚戒嘅佢用左手一邊撥弄頭髮一邊甜笑話：「哈！哈！哈！唔會喇，唔會喇。」然後同老公快步離開。
半小時之後，佢前夫霍震霆同班政協食完午宴後步出，小霍全程保持微笑，沒有透露剛才有否喺酒店巧遇前妻。問佢參加座談會有乜感受，小霍話會議旨在讓大家聚一聚，交流吓意見喎。
卓妮