熱錢近日湧入，港股三扒兩撥突破二萬點，唔少股票更熱炒「經濟復甦概念」，再度鹹魚翻生。有股市大好友聲言，牛市已重臨。後市係咪真係咁好景，我哋唔識睇，港交所主席夏佳理（Ron）就話，港股可能係轉勢，但經濟實體就未必嘞；咁股市係咪只係一陣虛火、同實體經濟又有乜關係，阿Ron就冇詳細解釋喇。
阿Ron尋日中午單拖現身香港會食飯，我哋追住佢問股市去向，佢分析話，近日股市升到你唔信，全因「錢多」作怪，事關市場陸續傳出好消息，個市自然借勢炒高。港股重拾牛氣當然可喜可賀，不過睇番外圍經濟環境其實依然五勞七傷，至於香港本身更加係失業率高企，打工仔飯碗不保，到底港股仲有冇再升空間，股民係咪應該趁高沽貨離場？
阿Ron頭擰擰話：「我真係唔識睇喎！」呢句說話絕對可圈可點，阿Ron縱橫股場多年，經歷幾番股災，但講到當前市況，連阿Ron都話睇唔通，睇嚟小股民想喺「金魚缸」撈番餐下午茶前，記緊帶定頭盔，有乜風吹草動第一時間跳車囉！