今年書展開幕特別熱鬧，除咗一班o靚模奇峰突出，成為焦點之外，灣仔會展中庭擴建落成儀式，亦揀喺當日同步舉行，展覽用地即時大四成，人流都暢順啲。潮流興廢物再用，會展中庭擴建時，拆咗一幅大玻璃幕牆，貿發局食得唔好嘥，將玻璃碎片製成一千個鎖匙扣吊墜，送畀出席落成儀式嘉賓，都算有心思！
上星期三出席過會展中庭擴建落成儀式嘅嘉賓，尋日收到貿發局一份禮盒，裏面有一隻介紹會展擴建工程嘅ＣＤ同小冊子，仲有一個精緻鎖匙扣，驟眼睇嚟，匙扣吊墜毫不起眼，似玻璃，又似透明塑膠，藍藍綠綠，手工仲有啲粗糙添，貿發局用嚟送畀嘉賓，究竟係乜冬冬呢？
貿發局都估到大家有疑團，所以喺鎖匙扣上掛住個小紙牌，解釋呢件小飾物嘅來頭，話係會展中庭擴建時拆卸出嚟嘅玻璃幕牆碎片製成嘅，畀大家留個紀念。哦，原來係咁，專登保留呢份原始粗糙感覺，舊舊形狀都唔同，獨一無二，意義零舍大。會展呢招廢物利用，其他公營機構第日搞重建、擴建，不妨參考吓。