潮州商會臥虎藏龍，成班鄉賢尋晚喺自己地頭潮州會館筵開八席，慶祝多位會董及鄉賢早前獲政府授勳，城中猛人盡出，包括今次獲頒「金紫荊星章」嘅玩具大王蔡志明、「銀紫荊」嘅觀塘區議會主席陳振彬和前天文台台長林超英，以及「銅紫荊」嘅前東華主席馬清鏗和潮州商會會長許學之，紛紛出席齊慶祝，年近九旬嘅「潮州之寶」饒宗頤難得現身，「好打得」嘅發展局局長林鄭月娥亦畀面撐場，仲由頭坐到落尾，卓妮都去湊熱鬧。
蔡志明心情靚爆，皆因太太蔡李惠莉及大女蔡加敏雙雙到賀，加敏賀爸爸獲獎之餘，佢老爺馬介璋都攞到「銀紫荊」，蔡馬兩家囊括「金銀」星章，難怪蔡志明話遲啲會自掏腰包筵開幾十席，請好友飲番杯。卓妮問佢會否將「金紫荊」送畀外孫女馬靄翹，蔡老闆擰頭話唔會，事關留番畀外孫女大個嗰陣憑實力自己攞。
林超英「送外賣」
攜眷出席嘅仲有「黑英」林超英，太太本來幫佢揪住個公文袋，但黑英一見卓妮舉機，即時從太太手上搶番個袋扮英偉小生。講起退休近況，佢自嘲做緊「送外賣」。此話何解呢？原來博學多才嘅佢，依家成為中學、大學、醫院甚至私人公司嘅搶手貨，頻頻發帖請佢講學，上至天文地理，下至如何做個健康快樂人都搵佢主講，一星期至少走兩、三場，佢講笑話呢種生涯有如「送外賣」喎。
不過嚟緊暑假終於可以抖抖，佢笑騎騎話：「我會去英國探一個窮作曲家，即係我個仔林丰。」林超英真係識講笑，查實林丰相當猛料，今年獲英國首屆十大傑出華人青年「大笨鐘獎」頒發音樂成就獎，林公子擅長鋼琴及大提琴，係首位獲英國廣播公司（ＢＢＣ）委約作曲嘅香港作曲家，亦是最年輕嘅中國作曲家，成就不遜於爸爸，又豈止係窮作曲家咁簡單呢！
講到暑假外遊，有份獲獎嘅陳振彬（Bunny）話，為答謝太太多年來默默支持佢，八月初帶家人去蘇梅島歎世界，自己潛水欣賞海底美景之餘，可以教兩位公子玩獨木舟，Happy到極！
馬清鏗回復白頭
同場嘅馬清鏗亦分外吸引卓妮目光，皆因馬主席頭頂髮絲帶點灰白，同年前一頭烏黑短髮差別甚大，原來有白頭髮先係佢嘅真面目，佢笑言之前做東華主席時，為免令人覺得佢做主席辛苦到白髮斑斑，惟有定期染髮；但自從今年四月落莊，終於可以做番自己，唔使再染髮，但佢仲係擔任嶺大及教院校董，幫手「撲水」，不過論籌款壓力就唔及東華大，依家總算樂得清閒囉。
卓妮