位於灣仔豐樂新邨旁的地盤工程正進行得如火如荼，但豐樂新邨居民陳先生則怒火中燒，「我住喺隔籬，一直都唔知會起成咁，成個『Ｕ』形屏風起喺前面，乜都遮到冚啦！」陳指居民一直只知悉地盤會重建聖公會聖雅各小學，今年四月動工時，才獲悉校舍將重建成三合一混合大樓，不少居民均大為錯愕，認為政府有意隱瞞，已組成關注組要求與當局對話，惟一直未獲合理解釋，居民坦言將力爭到底。

擔心加重交通負荷

另一居民麥先生亦擔心上址擴建成混合大樓後，勢必令人流增加，加重交通負荷，「嗰幢大樓成十六層高，到時一定好多人出入，啲交通都唔知搞唔搞得掂，政府根本就想偷天換日，起小學變咗起屏風大樓？」

對於居民的指摘教育局發言人一概否認，重申校舍重建工程由政府資助，而教堂及社區活動中心的重建費用則由聖公會以私人經費支付，而當局早在○八年已就有關小學重建計劃正式諮詢區議會。

不過，灣仔區議會主席孫啟昌卻指有關諮詢有取巧成分，「因為小學要向政府攞資助，咁先通知區議會，但有關教堂同社區活動中心嘅嘢就一隻字都冇提過，冇理由同一個地盤嘅嘢會斬件嚟講！」孫指當局倘在事前作詳細諮詢，便可得知居民意向，減少不必要爭拗。

團體炮轟欠缺規管

「本來起小學係一件好事，依家變成屏風小學，真係搞笑！」環保觸覺主席譚凱邦批評政府對於新建樓宇高度欠缺規管，令高聳的大廈愈建愈多。譚指上址位處市區，人煙稠密，興建大型建築物勢必形成「屏風效應」，對附近居民造成影響。

聖公會聖雅各小學校長張勇邦重申，校舍重建計劃並沒改變土地用途，亦多次聯同各方面與居民會面以釋疑慮，「新校大樓會有一個空中花園，加強自然通風，高度同附近大廈差唔多，唔會有好大影響！」張又稱，重建計劃已充分顧及鄰居感受，並將影響減至最小，加上該校已縮班，由原來一千多人，減至七百五十人，交通流量與之前無異。

記者　徐曉敏