冇理由喎，依家好多學校都有普通話課，點解啲學生哥咁水皮呢？大家有所不知喎，將「樞紐」當「書牛」嘅並唔係學生，佢哋係如假包換嘅教師嚟㗎。

最新嘅基準試評核報告踢爆，今年好多應考英文及普通話基準試嘅教師，成績慘不忍睹，肥佬多過乜。以普通話測試為例吖，只係得三成八達標，考生講得唔流暢都算嘞，講講吓竟然夾雜住「ＯＫ」、「Sorry」添，問你服未？

普通話測試成績固然冇眼睇，英文基準試都唔好得幾多，近五成半應考教師英文寫作肥佬，最離譜嘅係，好多連小學程度嘅過去式及現在式係點用都未搞清。可見語文基準試雖然大大話話已經推行咗九年，但完全係得啖笑，唔淨止毫無起色，教師語文水平反而仲每況愈下添。

咁多教師肥佬，簡直係香港教育嘅大笑話，究竟問題喺邊呢，係基準試制度有問題吖？抑或係香港嘅教師真係咁唔掂呢？

話時話，考評局出嘅試題一向夠晒騎呢，公開試居然出現Shit、Damn、Suck、What the Hell呢啲粗鄙字眼，又有「見鬼勿Ｏ嘴」、「潛水怕屈機」呢啲九唔搭八「潮語」，咁同搵個外星人出卷有乜分別？唔係誤人子弟係乜吖？所以基準試有問題，一啲都唔奇。

不過講到最誤人子弟咯喎，就肯定係香港呢個愈來愈畸形嘅教育制度啦。回歸之後，特區政府特別鍾意搵教師同埋學生做白老鼠，教育制度一年一小改，兩年一大改，愈令人無所適從，班官員就愈高興。

就以教學語言嚟講，首先搞咗個母語教學，然後有個上落車機制，最後又搞微調方案，朝令夕改，五時花六時變，咪話學生無所適從，連教師都畀佢哋玩死啦。

話說回頭，雖然教育制度確係亂七八糟，但為人師表者都要負啲責任，佢哋首先要做好自己嘅本分，不斷自我增值至得㗎。弊在依家只係見到好多教師考試肥佬，而且仲要強辭奪理話考試合格唔代表可教好學生，劑劑輸打贏要起晒弶，試問又點做學生嘅好榜樣呢？

所以呢，都係啲高官醒目呀，明知香港教育制度立立亂，仲唔一早送晒子女去外國讀書咩。乜嘢語文基準試、乜嘢教學語言微調方案，留番畀小市民慢慢歎啦！