今屆立法會首個年度結束，港大民意研究計劃早幾日總結議員過去一年嘅表現，結果顯示，十七個新丁議員當中，工聯會勞工界嘅潘佩璆同廠商會林大輝嘅知名度最低，竟然冇一個受訪者噏得出呢兩位仁兄嘅名字。
潘佩璆前日上電台，承認得知自己做咗立法會議員成年都冇乜人識，都有少少唔開心，佢仲自嘲話：「我一向唔會刻意提高知名度，因為我由細到大都冇乜人留意！」潘佩璆憶述，當年考完升中試，班主任第二日就好緊張逐個學生問番考得好唔好，不過就唯獨冇問到佢；直至落堂鐘響嗰吓，班主任先忽然醒起佢嘅存在，仲講笑話：「差啲唔記得咗你添！」可能潘佩璆已經慣咗畀人忽略，所以面對市民對佢零認知嘅窘境，依然可以處之泰然。
佢仲自我安慰：「其實有人聽我講嘢！」佢舉咗個例子，話第一次喺立法會大會上提出有關推動科研嘅動議後，財經事務及庫務局局長陳家強就讚佢講得好。不過，潘佩璆與其舉呢啲小事去印證自己嘅存在，倒不如的起心肝，諗吓點可以提高知名度、證明自己有做到嘢仲好啦！