青少年吸毒問題一日未解決，相信身為保安局局長嘅李少光（光哥）日日都要頭痛。上周四喺香港會撞到光哥，立即上前恭喜佢就嚟做阿爺。其實光哥嘅愛子李霖恩去年二月同女友拉埋天窗後，光哥一直恨抱孫，等咗年幾終於如願以償，光哥親口證實新抱已經有喜，佢今年十月就做爺爺，一嘗湊孫之樂。唔知呢個屋企新成員係孫仔定孫女呢？光哥話要問就問番個仔喎。不過佢話男女都無所謂，最重要都係個ＢＢ身體健康、順利出世。
依家新抱一個人食兩個人補，唔知光哥有冇買補品畀新抱進補呢？光哥話一啲都唔使佢操心，皆因雙方家長都好關心未出世嘅金叵羅，新抱有媽媽同奶奶睇到實，絕對冇問題。唔使煩惱補品，咁光哥買咗咩畀個孫做見面禮先？光哥聽到之後呆咗呆，恍然大悟咁話仲未諗禮物嘅事。