其實淦璇喺學習上都有唔少先天優勢，好似依家唔少家長為咗令仔女學好兩文三語，都會好揼本畀佢哋補習，但身為前高官嘅肥平英文同廣東話同樣流利就係人都知，而胡慧中嘅母語係普通話，所以淦璇透過日常對話就可以輕鬆學好兩文三語。

不過，明星出身嘅何太胡慧中就覺得讀書最緊要冇壓力，佢快人快語道來：「我唔使個女樣樣都叻，讀書『中停』，游水唔會浸死就得㗎喇！」話雖如此，其實何太都不知花幾多心機培育囡囡成材，佢除咗會好似一般家長咁，趁暑期額外買幾本補充練習畀女兒做之外，本身畢業於台大歷史系嘅胡慧中仲會不時講中外歷史故事畀淦璇聽，培養女兒對歷史嘅興趣，佢同肥平簡直堪稱廿四孝父母。