WK搞完奧運馬術後休息咗幾個月，尋日出山講佛偈，佢話自從鑽研佛學後，眼界闊咗，睇嘢無以前咁狹窄；如果早幾年學佛，當年做官就唔會「自我為主」。WK學佛後有所反思，話十幾年前做官推行老人退休金計劃時，因為用保險銷售手法推銷政策，缺點多多，惹來好大爭議，惟上級壓下來，就算隱惡揚善都要推行，最終不得人心，結果失敗收場。

回想當年挫敗，WK有感而發，話為官之道，千祈「勿自我為主、以我為尊」，謹記官與民不是相等，一個普通市民因為不滿而上電台鬧幾分鐘，過幾日就無人會記得，但高官行錯一步就有好大影響，會影響好多人，所以佢認為為官者應「以大侍小」，當權者應該謙虛和氣量接受批評。佢意有所指話：「如果個個（市民）粒聲唔出，就以為咁就和諧，咁個社會就死得嘞！」

責老人政策歎慢板

WK話，當年做官時即使出入有政府車輛和司機接送，但他每日放工都寧願自行由中環乘坐港鐵轉車返回新界住所，後生體力好就無問題，但現時年紀大了，才體會到長者嘅難處，例如在公共地方上落長長嘅樓梯，發現老人設施嚴重不足，加上屋企有個八十歲老人家要佢照顧，所以覺得老人政策相當重要。

WK話鋒一轉，批評香港老人政策不足，佢話本港人口急劇老化，老人愈來愈多，一方面家庭對長者缺乏照顧，社會嘅關注亦又未有聚焦，最弊係一班政府高官只顧眼前問題，推動老人政策就歎慢板；如果再拖十年、二十年，到時再解決已經太遲。WK更加講佛偈話：「萬事都有因有果，如果今日無提醒政府加以改善，他日就要承受後果！」

WK平時甚為寡言、好好先生一名，點知一開聲就如雷貫耳，同王永平簡直儼如雙響炮，對視民望如浮雲嘅煲呔曾來講真係當頭棒喝；睇怕煲呔曾都應該棟高床板諗吓，諗吓點解有咁多前高官接二連三出來批評佢治下嘅特區政府。