雲集港政商名人

好多官場及商界嘅名人尋日都捧陳晴場，除咗扮嘢文之外，仲有發展局局長林鄭月娥、商務及經濟發展局常秘區璟智、立法會議員霍震霆、新世界集團非執董紀文鳳、富豪集團執行董事羅寶文、協成行老闆方潤華嘅公子方文雄同埋前民政事務局局長何志平伉儷，連全國人大常委范徐麗泰等都為本書寫序，陳晴都算面子大嘞。

區璟智備有書面講稿，佢致詞時話同陳晴喺海洋公園董事局結緣，本書一到手已經睇咗兩次，佢唔單止對書嘅內容同相片好熟悉，連陳晴家中三隻狗狗嘅名字，佢都瞭如指掌，睇得出佢幾咁有心。

陳晴（右）喺台上送書畀霍震霆，面貼面場面溫馨。 （陳德賢攝）	區璟智唔止睇咗本書兩次，仲寫好講詞。	林鄭月娥都罕有地畀面出席分享會，佢話陳晴對小熊貓晴晴好過佢對囝囝，珠玉在前，佢唔敢收養熊貓喎。　（林蔚恩攝）

方文雄影封面相

身兼香港中華總商會副會長嘅方文雄原來係攝影發燒友，陳晴雙手緊抱熊貓晴晴嘅《兩晴相悅》新書封面相，都係出自佢手筆。方文雄話張相係○七年同陳晴上四川臥龍大熊貓保護區時影低，亦係佢首次有作品成為新書封面相，所以都會買五十本送畀朋友，以示支持。

紀文鳳同陳晴識咗十幾年，話自己都係熊貓家族成員之一，陳晴叫佢姐姐，所以晴晴係佢姨甥女喎。紀文鳳都話會買二十本支持，仲會將一部分送給新世界有份援建嘅北川中學。羅寶文同陳晴就因為愛狗而認識，佢話已經買咗幾十本，準備送畀學校及慈善機構；霍震霆都話會買多幾本送畀朋友。位位朋友都係二十本、五十本咁買，唔怪得陳晴話已經諗緊遲啲臥龍重建完成後寫續集啦，佢下個月仲準備喺北京推出簡體字版添！

卓妮