一年一度嘅書展好受歡迎，財政司司長鬍鬚曾尋日都去湊熱鬧，日前煲呔曾以皇帝架勢巡場，搞到書商、市民大受影響，鬍鬚曾又點呢？答案係唔好得幾多，雖然佢哋刻意搵保安築成人牆隔開採訪記者，點知反而引起媒體同保安起衝突，最後又係混亂收場！
鬍鬚曾尋日先去咗一個讀書分享會，同班青少年講吓閱讀經驗，之後就喺隨員、會展保安簇擁下巡書展，唔知係咪日前煲呔曾巡場遭到批評，鬍鬚曾尋日刻意帶少咗人，又搵保安隔開傳媒，但呢個安排阻礙採訪自由，引起現場記者不滿，加上保安人員要交功課，結果反而引起衝突。
入到會場後，鬍鬚曾喺保安員同隨員包圍下，圍起人圈巡場，想接近其他書檔都難，最後佢匆匆去到一書檔，揭咗兩本書，其中一本就係內地根據紅樓夢故事創作嘅漫畫書《熙鳳弄權》，睇嚟鬍鬚曾對紅樓夢裏邊掌管賈府財政大權嘅璉二奶奶亦感到好奇，但佢最後都冇掏荷包買。
書展裏邊人頭湧湧，鬍鬚曾呢個人圈入咗去後，想唔混亂都難啦，擾攘咗十分鐘，都係無奈咁快閃離場。