卓妮尋日下午四點行過太古廣場，遇到阿瑟王同太太Diana兩公婆拖住手行街，相當煙韌，原來兩個準備去睇尊尼特普及「蝙蝠俠」主角基斯頓比爾合作嘅《大犯罪家》，慶祝三十五周年珊瑚婚，睇完戲後會食晚飯撐枱腳。卓妮問Diana，阿瑟王當年向佢求咗幾多次婚？Diana話只係一次咁多，咁就嫁咗畀阿瑟王嘞！真係求婚無難度。

結婚三十五周年叫珊瑚婚，但英文又叫Jade（翡翠） Wedding，以阿瑟王今時今日地位，無理由送珊瑚㗎，梗係送翡翠啦，卓妮於是細細聲用中文問阿瑟王係咪送翡翠畀老婆做禮物，樓上有得賣翡翠玉石喎？阿瑟王就好搞笑話：「死火啦，死火啦！我太太識聽英文又識講中文，你喺度搞搞震，啲翡翠咁貴，我無錢買，唔好搞我好喎！」阿瑟王真係識講笑，當年佢喺眾高官中，出咗名樓多，手中揸嘅樓，多到佢自己都唔知邊間打邊間，買翡翠，佢絕對綽綽有餘啦！

卓妮