嗱嗱嗱，咪住先，唔好以為功夫茶借頭借路講粗口，家陣講嘅係名副其實頂心頂肺，同粗口無關。

不如咁啦，先解釋一下乜嘢叫做肺。但凡種植好多花草樹木嘅公園，一般都叫做市肺，事關花草樹木吸收廢氣，釋放氧氣，就好似幫助都市呼吸咁。

解釋完乜嘢叫做肺，當然要跟手講講乜嘢叫做頂。

係咁嘅，面積僅次於維多利亞公園，稱得上港島區第二大市肺嘅鰂魚涌公園，原定明年初展開擴建工程，計劃打造一個十五公頃嘅海濱公園。吖，負責其事嘅康文署居然遲遲無法開工喎，連設計工作都要叫停。原來，目前佔用公園地皮嘅三個政府部門並未如期遷出，連交回地皮嘅時間表都冇。呢三個以臨時撥地形式佔用地皮嘅部門，包括警務處嘅汽車扣留中心、食環署嘅車房以及水務署嘅工程維修站。

講到呢度，大家明白未？三個衙門賴死唔走，阻頭阻勢累到擴建工程遙遙無期，咪就係頂住鰂魚涌公園呢個市肺囉！

人人都知道香港空氣污染有幾嚴重㗎啦，原本可以利用擴建市肺改善一下嘅。家陣冇咯，政府與民爭地，變相害你冇得透氣。

話時話，所謂「臨時撥地」其實好鬼死荒謬。食環署嘅車房，「臨時」咗十三年；警務處嘅汽車扣留中心更加誇張，居然「臨時」咗十四年。所以話啫，頂住鰂魚涌市肺嘅衙門應該係完全冇誠意搬走嘅，如果真係要搬，Ｎ年前搬咗啦，難怪區議員形容佢哋係「租霸」。

如果一切順利進行，擴建鰂魚涌公園嘅願景相當唔錯㗎。根據建築署委聘顧問公司做出嚟嘅設計，公園會以「東方色彩」作為藍本，園內豎立鰂魚同埋石礦等等特色地標，以紀念相傳有鰂魚從石礦場衝出而命名為鰂魚涌嘅典故。擴建部分同時又設有多用途廣場、社區園圃以及香味花園等等設施。係咪好正呢？對唔住，由於租霸阻住地球轉，咁正嘅設計只可以出現於幻想裏面。

唉，好心曾蔭權唔好餐餐空口講白話啦，又話打造六大優勢產業，又話環保係其中之一，借問聲，連打造鰂魚涌市肺改善空氣質素都遙遙無期，何以見得環保有優勢？

計功夫茶話齋，環保不但冇優勢，反而簡直係劣勢。就好似鰂魚涌公園咁吖，居民投訴惡臭難耐，原來食環署周時停泊垃圾車，經常傳出異味。理應鳥語花香嘅公園，居然搞到蔫崩爛臭，你話係咪頂心頂肺先！