立法會開始休會，好多議員都已經進入放暑假心態，即使去立法會開其他委員會會議，衣着亦隨便咗好多。外號「象哥」嘅民建聯議員黃定光，早兩日就着住件心口印咗隻大象嘅Ｔ恤開會，非常醒目。原來佢間屋計計埋埋有成幾百隻大象，由Ｔ恤、領呔、到各式各樣嘅擺設都有，認真架勢！
象哥當年出世足足有成十磅三安士重，喺當年嚟講非常嚇人，連佢媽媽都形容佢有一對象腳，「大象」呢個花名亦由此而來。象哥話，其實佢自己絕少畀錢購買有關大象嘅嘢，但好多家人同朋友知道佢有呢個外號，每次外遊買手信或者過時過節，都會買相關嘅禮物送畀佢，搞到佢一屋都係大象，僅水晶象已有過百隻，仲有大大小小嘅木製、石製同瓷器擺設，多到數都數唔晒。
象哥自己雖然唔算係大象迷，但對呢個外號同有大象圖案嘅物品唔抗拒，事關佢覺得大象出名好有靈性，係少有懂得親情同友情嘅動物，佢太太亦好喜歡，唔會因為擺到成屋大象而埋怨佢。