嘴角有痣兼口歪

嘴巴可以睇出一個人嘅欲望同埋氣量，同時關係到人際交往嘅成敗得失，有冇貴人幫忙，都係靠把口，所以一個人一定要把口生得靚。最合適嘅係大小適中，唔好被紋侵痣破。

另外嘴歪都係唔好嘅，把嘴唔講嘢都歪埋一邊，呢啲已經唔使審係天生歪嘴，但有啲女性喺笑同講嘢時至出現，呢啲都算係歪嘴，歪嘴嘅人最喜歡講是講非，而且周不時出口傷人，最大問題係自己講咗都唔知，於是得罪人多稱呼人少，人際關係差，拍拖經常分手收場。

如果嘴角有痣，代表你好喜歡講嘢，見到朋友就會雞啄唔斷，但好可惜辭不達意，往往因為講錯嘢而得罪人，係招惹是非之相，如果嘴歪兼有痣，咁你情路一定好坎坷，常常遭男友生厭而分手，最後一場罵戰難免，經常被狠批得體無完膚。

眼皮多層三角眼

女性嘅眼皮，唔係單就係雙，但原來有啲女性係多層眼皮嘅，呢啲女性性格開朗，工作認真，但腦筋比較遲鈍，反應較慢，所以做事唔識得變通，一本通書睇到老，除咗係不懂浪漫嘅悶蛋之外，仲經常對伴侶疑神疑鬼，令好好一段感情出現裂痕。

另外如果再配埋三角眼，咁就真係大件事，三角眼嘅女性觀察入微，很會堅持己見，所以佢哋心裏嘅負面訊息，將會愈弄愈大，伴侶點解釋都唔會聽入耳。而且愛好爭辯，以歪理力爭，用辭句句頂心頂肺，令男朋友忍痛與佢分手。

由於三角眼嘅女性太過強勢，而且說話唔客氣，所以好多男仔事後都會耿耿於懷，最後會做出報復嘅行為，將事情愈搞愈大，所以女性唔止感情受傷，有時更會身體或者名譽受損，有咁樣特徵嘅女性真係要小心。記住，凡事留一線，免得傷上加傷。

鼻樑有節兼有紋

面相學中鼻十分重要，佢包括鼻樑、準頭、金甲（鼻翼）同埋鼻孔，主要係講一個人嘅財運，而女相更係睇埋佢嘅老公有幾愛佢同有幾本事，所以女士嘅鼻一定要生得好，一般以有肉高挺為準，而成個鼻嘅主脈，就係喺鼻樑上，一定要夠高夠直。

如果鼻樑有節，表示女性嘅性格比較屈強，做事好勝，好多時做嘢自把自為，唔聽人勸，男友想痛錫佢都冇機會。兩人經常處於冷戰中，大家不瞅不睬，更唔會互相傾吐心事，就算勉強一起，最後都係忍無可忍， 難免分手收場。

另外，鼻樑上千萬唔好被紋侵痣破，原來女性鼻樑上有痣或者有紋，就係有桃花劫嘅徵兆，輕則感情會出現第三者，嚴重嘅會因桃色事件導致身敗名裂。所以鼻樑有問題，愛情路上唔只波折重重，而且仲有危險事故發生，所以真係要小心。

撰文：娟娟