無先例可循

公營機構同發展商打官司嘅案例唔多，立法會就更少，所以呢次新世界官司，可以話無先例可循，訴訟費問題，存在灰色地帶，有待釐清。站在政府角度，按現行規則慣例，公營機構打官司，應由儲備撥款，儲備乾塘，先至由政府墊支，立法會亦應如此。更何況，政府估計，今次立法會同新世界對簿公堂，唔會學小甜甜千億遺產案咁動用上億元訴訟費，頂多一千萬左右就搞掂，對立法會嘅一億四千萬元儲備，九牛一毛啫。

不過，立法會方面就唔係咁諗，直指立法會唔係公營機構，而係政府嘅一部分，地位等同政府部門，按現行做法，部門同私人機構打官司，由律政司負責，部門一個崩都唔使出，所以立法會各政黨代表前日開行政管理委員會後一致認為，今次同新世界對簿公堂嘅訴訟費，應由政府全數承擔，橫豎煲呔曾成日話提升行政立法關係，今次係表示誠意嘅機會嘞。

據聞，煲呔曾同立法會主席喺電話表明，希望立法會同政府一齊分擔訴訟費時，立法會主席當時無回應。梗係啦，要政府全數承擔訴訟費係各政黨代表開完行政管理委員會後嘅一致決定，有邊個夠膽自作主張，擅自推翻決定？不過，特首辦發言人尋日對我哋話，政府仲係希望立法會先調撥其現有資源或其儲備去應付今次訴訟嘅開支；如果立法會需要額外資源，政府願意積極協助。

咁講法，立法會同政府仲係各執一詞，結果可能係政府和立法會共同分擔訴訟費，亦可能係由立法會先墊支、再由政府支付，仲可能由政府直接支付，睇嚟立法會主席同秘書長吳文華同政府仲要繼續拗數，唔知煲呔曾想點埋尾呢？