好嘞，開波，功夫茶今日想講一講控煙辦。為咗進一步加強及協調政府嘅反吸煙工作，衞生署喺○一年二月成立控煙辦公室，作為《吸煙（公眾衞生）條例》嘅主要執法機構。所謂執法，當然就係阻止市民違例吸煙。

不過有一個問題都幾頭痛，控煙辦人手其實好少，總共唔夠一百人，面對全港幾十萬煙民，三頭六臂都搞唔掂。所以控煙辦就諗咗一條絕世好橋，淨係收到投訴先至調查，唔會主動出擊。假設功夫茶喺室內違例食煙，唔知邊條茂利報寸，你估功夫茶驚唔驚吖嗱？梗係唔驚啦，投訴得嚟，調查得嚟，成支煙都灰飛煙滅咯，你吹乒乓呀！所以咯喎，控煙辦有一個花名，叫做「扮控煙」。

咁都未算，控煙辦直情係屋漏更兼逢夜雨，人手已經少得可憐㗎啦，點知流失率長期高企，周不時有人劈炮。於是乎，唔想扮控煙都唔得。

為咗解決呢個咁頭痛嘅問題，你都咪話政府官僚唔諗辦法，不過所謂辦法相當愚蠢咁解。呢嗱，就咁，政府將多個部門納入執行禁煙名單，包括康樂及文化事務署，理論上康文署轄下嘅圖書館館長都要去捉煙民。呢個拉伕嘅做法講得好聽係擴大兵源，講得難聽就係拉雜成軍。

等功夫茶又問一問大家意見吖。假如閣下係康文署職員，平時負責嘅係好有文化氣息嘅工作，管理琴棋書畫諸如此類，失驚無神叫你去捉煙民，話唔定要開張告票畀一個左青龍右白虎嘅紋身大漢，你會點諗呢？相信閣下嘅意見會係咁：唔好玩啦，畀紋身大漢鬧兩句事小，點知對方會唔會一個沙煲咁大嘅拳頭打過嚟㗎！

康樂事務職員總工會主席張兆榮係咁講嘅，當局罔顧員工安全，有關安排超越原有職責，可能違反《基本法》規定。所以張主席聲稱：「如果部門一意孤行，工會惟有同政府打官司！」

嘩嘩嘩，今次大煲咯，假如康文署工會真係訴諸法律行動，而且係指控政府違反《基本法》，曾蔭權仲有面嘅？莫講話政府敗訴吖，淨係上庭受審已經夠震撼。

冇咯冇咯，前排警察醞釀上街遊行爭取逆市加薪，即使最後關頭叫停，特區政府嘅管治威信已經幾乎掃地。如果再一次因為控煙問題而搞到一鑊泡，蠻幹瞎搞一番，煙民捉唔到，反而畀人捉到涉嫌違法嘅痛腳，煲呔曾肯定有得震冇得瞓。

計功夫茶話齋，唔好搞咁多嘢咯，控煙辦反正都係扮控煙，咁咪繼續扮落去囉，費事拖其他部門落水吖。除非，曾蔭權做到懨懨悶悶，想提早落台湊孫就另計。