亡命瘋狂大賽車——並非警匪片才有得睇，現實比影片更瘋狂——警方在觀塘繞道進行反非法賽車行動時，一時「判斷有問題」，倉卒將貨車、的士及私家車作路障，結果釀成十一車連環相撞的重大意外事故。

受害者不滿警方找他們作「人肉沙包」，鄧一哥出來道歉，講句「判斷有問題」，受害者如的士大佬便原諒了他，並說：有人回應交代、警方肯負責最好，唔肯……都冇辦法。你睇，香港市民幾咁大方，幾咁善良！所以話香港即使有一百萬人上街示威，冇問題！換了是南韓，即使一百個學生哥遊行，可能好大鑊！老朽建議在此次「無啦啦、整撻瘌」的受害司機，全部獲頒「英雄勳章」及「好市民獎」，呢個建議起碼畀市民覺得：警方一哥唔係「手指指，靠飛史（face）」。

老朽記得一則不好笑的笑話：話說一個地方，賊人見到差佬怕怕係正常，之不過，如果好人好姐見到差佬都怕，你哋話正唔正常呢？老朽都係揸車嘅，今後，見到警方的路障，竟然有《哈姆雷特》的兩難：to be, or not to be, that is the question!當差佬設路障，手指指時，我……究竟……停？唔停？真係一個難題！真係慘過母親的抉擇！自從發生了警方「判斷有問題事件」後，警方一設置路障，老朽便依稀彷彿見到……總之，唔多老利！

物理學中的牛頓三定律，其中第一個又稱「慣性定律」，即任何運動的物體都有慣性。這個著名的定律其實也可以用於政治，譬如見到鄧爾邦唔係想起平機會而係諗起大花筒，見到邱騰華即刻肉赤：又要被罰五毫喇！以前見路障想停車，今見路障想飛車！警方都算巴閉，連牛頓定律都推翻！