政府叮走澳洲纜車公司高層後，當年嘅車廂經理張少華臨危受命接手昂坪360呢個燙手山芋，眨吓眼兩年過去，最近佢被召返娘家港鐵紮職做車務營運總管，二十日就會離開三碌拎，準備返新工。尋日同佢傾偈，至知佢唔單止識管纜車，做人仲八面玲瓏，邊個支持過佢，佢都銘記於心，包括佢口中嘅「寶蓮寺僧人」。
喺三碌拎最後一個禮拜，呢粒明日之星尋日回望過去兩年，有喜有悲，最開心係見到纜車重開，話其實當時戰戰兢兢，因為雖然事前做咗好多推廣，但人算不如天算，客人嘅諗法又無法估計。點知重開嗰日，有兩個學生為咗霸頭位坐纜車竟然去車站紮營，最估唔到係連當初誓死唔肯踏足纜車站半步嘅一班寶蓮寺僧人（即係寶蓮寺釋智慧大和尚），都去撐場，真係令佢又驚喜又感動。講到呢度，佢好感觸咁話：「能夠挽回市民信心，對我自己同公司都好重要！」
張少華過去兩年嘅曝光率奇高，佢希望將來唔會有同樣情況喎！佢唔係謙，只係因為佢返總部做車務營運總管，每逢港鐵車廂問題同開新站都關佢事，佢有機會曝光，即係唔慌好嘢喇。