豬流感在社區大規模擴散，確診個案累積到千幾宗，相比七百幾萬人口看似唔係好多，但偏偏立法會議員甘乃威嘅女兒蕊嘉就中咗招，要在屋企自我隔離七日。甘乃威尋日話，女兒上周跟隨學校合唱團到馬來西亞比賽，回港後第二日就開始發燒，食過醫生開出嘅特敏福後，兩至三日後開始退燒，至今已無乜大礙，隔離期過埋今日就完結。
甘乃威話，據聞女兒比賽期間，遇到其他國家參賽隊伍有參加者發燒，估計女兒因此受到感染。雖然豬流感食藥無事，但甘太就好緊張，特登請咗一星期假留在家照顧愛女，又擔心特敏福有副作用，曾一度拒絕讓女兒服用，反而甘乃威就擔心下月歐洲之旅多啲。
原來甘乃威計劃與家人下月初到捷克、奧地利及瑞士自遊行十八日，來回機票都買咗，但佢竟然擔心到時突然發燒被拒入境，最慘就係旅遊保險講明無得賠，所以佢唔敢訂定酒店，費事連酒店錢都蝕埋。甘乃威搞得雷曼多，果然數口練精咗喎。