澳門特首選舉唯一候選人崔世安自從喺上個星期六公布參選政綱後，連日來不停約見不同界別嘅選委。佢尋日現身新葡京宴會廳，同澳門博彩業管理暨中介人總會，以及博彩承批公司代表舉行座談會，聽吓業界意見。主持會議嘅仲有身兼總會會長嘅賭王四太梁安琪，同埋身兼總會監事長嘅英皇集團主席楊受成。
博彩業係澳門經濟命脈，尋日個座談會吸引咗一百五十幾個業界人士捧場。有與會者提及業界最關注嘅博彩稅問題，事關有完善配套設施同監管體系嘅新加坡，正係對澳門最大威脅嘅開賭地區，新加坡嘅博彩稅稅率極有可能喺一成八至一成九之間，比稅率近四成嘅澳門低，希望崔世安可以減稅。
對於業界訴求，崔世安話明白金融危機加上全球疫症令旅客數目下降，而且周邊地區都紛紛發展博彩業，令業界有壓力。佢亦收到唔少業界想減稅嘅意見，所以會循住澳門整體稅收嘅情況去諗，不過仲需要時間去研究咁話。