Miriam狠批副局政助三宗罪，其中一樣，就係政助毫無表現，大家唔知佢哋做乜。我哋前日以書面向各位副局政助查詢，問佢哋講講過去一年做過啲乜。平時官僚效率慢半拍，今次即晚就覆晒，不過，睇過覆文就知原因，因為係清一色樣辦答案，係山寨廠倒模大量生產式官方文件。

副局長中，環境局嘅潘潔、政制及內地事務局嘅譚志源、財經事務及庫務局嘅梁鳳儀（連政助伍潔璇）、民政事務局嘅許曉暉（連政助徐英偉）、運輸及房屋局嘅邱誠武，佢哋嘅答案，格式、內容幾乎倒模一樣，全部係開首簡介職權範圍，然後係議會工作，有Ａ、Ｂ、Ｃ項，再到地區工作Ｄ、Ｅ、Ｆ，傳媒及公眾關係就係Ｇ項，千人一面，政治化妝都慳番，納稅人年花千萬請佢哋做政治工作，係咪等如倒錢落鹹水海先？

食物及衞生局副局長梁卓偉同政助陳智遠較為「獨立」，識得重新剪裁吓啲格式，有小學勞作堂嘅水準，不過，答案亦都係跳唔出「標準答案」嘅框框。

政助方面，書面回覆一樣係倒模式產品，只係將分項由ＡＢＣＤＥＦ，改為１２３４５６，發展局嘅張文韜同教育局副局陳維安一樣，以休假為由，直頭無回覆。勞工及福利局嘅莫宜端同教育局嘅楊哲安，就用電話回話，保安局嘅盧奕基同財爺政助葉根銓亦書面回覆再補電話。

上任一年唔知做過啲乜

不過，政治初哥一超出預期範圍就出事，楊哲安答我哋點解少咗落立法會時話，初期有主動要求列席立法會，後來見無發言權，所以就唔再去，改去見教育團體喎，仲自爆只會搵政黨核心傾偈，其他非核心嘅，「佢哋嘅意見，睇電視、報紙都睇到啦」。咁都得？

副局同政助已經成為港府嘅民望負資產，有政助私下直言，上任一年嚟，被人問得最多嘅，就係職責係乜？做過啲乜？真係諷刺同可悲！