16/07/2009

中環出更:胡文新化身哈利波特變旺EMax

合和太子爺胡文新接棒家族生意後搞作多,尋晚喺旗下地頭九龍灣國際展貿中心EMax搞《哈利波特——混血王子的背叛》首映禮,請來城中幾十位美艷性感模撐場,胡文新身邊獨欠一個女伴,只得阿媽胡郭秀萍捧場打氣,不過胡文新一啲都唔寂寞,事關佢好似哈利波特咁,手上有支魔術棒,今次大筆一揮,將佔地三萬平方呎大嘅「匯星」表演場館,變身成可以容納二千人一齊睇戲嘅超級電影場館。

卓妮都係哈利波特迷,尋日貢去湊熱鬧,胡文新行埋去同幾個哈利波特打扮嘅演員一齊合照,認真搞鬼。哈利波特迷倒萬千觀眾,胡文新都話睇足咁多集,感覺頂呱呱!

打造首映場地

講番今次EMax大變身,據聞係由胡文新全權打骰,佢覺得香港可以搞首映嘅場地唔多,最多只可容納二、三百人,於是萌生做大型電影場館嘅念頭,訂咗一塊四層樓高嘅巨大銀幕,又添置環迴立體聲,方便貴客包場搞電影酒會或慈善晚宴。卓妮八到,包場搞首映,畀三十幾萬就搞掂。

胡太愛睇星爺

阿仔有大搞作,胡太郭秀萍亦悉心打扮撐場。佢自爆鍾意睇笑片,周星馳嘅搞笑片係心水之一。尋晚胡太撇低老公胡應湘撐阿仔,暑期就會抽空陪老公遊長江三峽補番數喎。

同場仲有前立法會議員楊孝華公子楊哲寧,佢話屋企近日熱鬧咗,事關早前留學澳洲嘅爸爸返咗香港,急不及待探吓細仔楊哲安同新抱張燊悅個BB女,仲帶咗大袋澳洲泥蟹做手信,食到全家唔停口。

卓妮轉頭撞見滙豐亞太區企業可持續發展總監區佩兒,佢帶埋一對仔女同公子女友一齊睇首映。卓妮笑佢能頂半邊天,佢就謙稱頂頭上司係男人,公司唔算係女人嘅天下喎!

卓妮

會考資訊一click即睇
詳情瀏覽on.cc《放榜無限分2009》

直擊人類豬流感最新疫情
詳情瀏覽on.cc《奪命流感》