長沙灣元州邨元雅樓對開設有多個時租車位，原開放供居民使用，但因出入口的八達通系統遲遲未啟用，致車位常遭佔用。房屋署早前為杜絕濫用而將車位暫時封閉，引起居民曹先生不滿，「入咗伙成三個月，因為未搞掂嗰八達通（系統），結果就變成有位都冇得泊，真係好離譜！」
當區區議員覃德誠狠批房署行政失當，「唔好講話個（八達通）系統，條邨好多配套，好似老人中心都係得個窿，乜都未整過，好明顯房署冇做好監管工作！」
元州邨物業服務辦事處發言人承認，早前因屋邨的八達通系統未啟用，令邨內停車位及行車通道被長期佔用，造成阻塞。該處遂實施管制入邨車輛，只批准搬運貨物、家具及接送老弱傷殘人士車輛進入。
