七月初政府將禁煙區擴大至娛樂場所，但巴士站仍設有煙蒂箱，不少候車乘客不滿被迫吸入二手煙。常於長沙灣廣場外的巴士站乘搭巴士的周小姐指出，巴士站旁垃圾桶附設煙蒂缸，長期吸引煙民靠攏吸煙，「等緊巴士又冇得走，畀啲煙兜口兜面咁噴，真係好慘！」周多次向食環署投訴卻不得要領。
「成條街咁長，冇理由一定要擺喺巴士站！」深水埗區議會環境及衞生委員會主席林家輝認為，事件凸顯食環署處事僵化，市民無辜受累，認為長遠亦須將巴士站列為禁煙範圍。
食環署發言人指出，上址並非法定禁煙區，加上上址人流較多，為保持地方清潔，堅持有必要設置廢屑箱及煙蒂箱。發言人稱，現已改用獨立式的新設煙蒂箱，可令煙蒂較易熄滅，釋出煙亦較少，有助減輕對市民影響。