中國人話創業難，守業更難，似乎未必適用於合和實業主席胡應湘（Gordon）同公子胡文新（Thomas）身上，近年退居幕後嘅Gordon尋日被問及第二代接班，佢都笑笑口話滿意，面上簡直寫住「老懷安慰」四個字。
Gordon喺近期合和嘅項目中都少咗現身，大項目主要由擔任合和聯席董事總經理嘅Thomas負責領軍。尋日Gordon出席一個政黨經濟顧問小組嘅會議後話，自己年紀都有番咁上下，加上Thomas搞得唔錯，令佢相當放心。
近年合和喺香港嘅業務同埋台前工作，都由Thomas負責走出台前，Gordon就對內地業務比較有興趣。Thomas前年將九龍灣國際展貿中心翻新，變成依家嘅EMax商場，咁啱紅磡體育館舊年大修，唔少演唱會都去咗EMax搞，依家紅館開番，EMax功成身退，話咁快又變身成為有三千座位嘅一間專搞首映禮場地，好似聽晚頭炮，就有《哈利波特》放映會，唔少電影文化界中人都會畀面出席，唔知Gordon會唔會捧場呢？