連日來炎熱嘅天氣，不斷喺度提醒大家暑假已經到啦！辛苦咗成年，立法會秘書長吳文華（Pauline）已經計劃好今個暑假嘅節目，就係去法國巴黎同班中學同學敍舊，期間仲會入住一座堡壘，聽落真係好特別喎！
早幾日Pauline現身立法會足球賽，講起暑假何處去，佢話八月尾至九月初會去巴黎以南、大約三個鐘車程嘅地方，同佢四十年前一齊喺德望中學畢業嘅同學敍舊。咁何解去到巴黎咁遠呀？原來佢班舊同學之中，有人喺嗰度買咗一座堡壘，所以成班同學留喺嗰度住，堡主仲特登花咗一年時間，將成座堡壘裝修好，等每個同學都有一間客房住，相當有意思。除咗留守喺巴黎，Pauline話佢可能會去一去德國幾日，唔知會唔會參加當地著名嘅啤酒節呢？
Pauline自從今年上任做秘書長之後，工作接踵而來，趁暑假抖番吓都好應該。不過，問到佢今次歐遊會一個人去，抑或同粵語正音專家男友何文滙一齊去，Pauline只係笑笑口話呢次係同學敍舊，其他就無再講落去，睇嚟都冇排除呢個可能性噃！