政府推行膠袋稅搞到市民怨聲載道，但喺唔想畀錢嘅情況下都逼住要帶環保袋出街。零售管理協會主席麥瑞琼（Caroline）尋日出席一個活動時就話，帶一個袋唔夠，應該要帶夠三個，佢身上經常有三個環保袋傍身，已經唔係今日至開始。
點解要帶三個袋咁麻煩呢？Caroline話依家環保得嚟都要兼顧埋衞生，三個袋係分開唔同嘅用途嘅，佢會用一個袋嚟放濕貨，一個放熟食，剩低嗰個就係擺啲唔食得嘅嘢，例如係清潔用品等。諗落其實又啱喎，將啲嘢分開嚟放，一來衞生妥當，二來分散重量，真係一舉兩得，唔怪得Caroline推薦市民跟佢「分袋」啦！
其實Caroline都質疑膠袋稅嘅成效，佢話依家有九成市民都係用超市派嘅膠袋做垃圾袋，無免費袋即係意味要另外買垃圾袋，到最後膠袋稅係慳咗袋定係用多咗袋，真係要到埋單計數嗰一刻先知，佢只係知道，超市售貨員做多咗嘢，就係要幫政府解釋膠袋稅政策，一日講幾十次，口水都講到乾埋。