吳斌尋日公布嘅個案發生喺○六年，一間連鎖式傢俬店收集成四百幾個員工嘅指紋資料，用嚟登記員工嘅考勤記錄，如果員工唔遵從就會被解僱，結果其中一位員工打電話向公署投訴。吳斌又摷番幾年前嘅年報出嚟講，話有兩單類似個案，其中一間小學用咗學生指紋記錄學生返學同借書情況，另一單就係一個辦公室用員工指紋登記返工時間。吳斌話，收集個人資料一定要得到當事人同意，仲要小心保管收集返嚟嘅資料。

自認無牙老虎

佢仲話，除咗記錄指紋資料，依家愈來愈多機構用掌紋、眼球、容貌等生物辨識技術登記員工資料，呢啲資料既個人又敏感，稍一不慎隨時違規。

佢之後就打蛇隨棍上，話啲立法會議員成日鬧佢係無牙老虎，佢都認同呢個講法，皆因佢要等到收到投訴之後，先可以急急鑲番啲牙落去，出手叫呢啲違規公司改善做法；佢話之前已經同政府講咗，要求加重違反私隱條例嘅罰則，咁先可以收阻嚇作用喎。

其實吳斌成日同人呻，話公署又無權又無勢，只可以不斷向違規機構發出提醒同勸喻，之前已經向政府表明，希望盡快修改條例，容許公署有更大權力。吳斌今次無事搵事嚟講，擺到明又係要話畀政府知，要快啲畀多啲權佢，其他就講來講去都係三幅被。

呢招有無效就仲未知，但已經畀人覺得公署做嘢無效率，幾年前嘅個案到依家先公布，隨時偷雞唔到蝕渣米！