前商務及經濟發展局局長馬時亨辭官轉眼一年，管制期已經喺本月十一日結束，由本周日（十二日）起，肥亨終於回復自由身，以後海闊天空任我闖，做乜嘢工都唔使吓吓要等政府審批喇！近日肥亨就有新動向，繼早前做咗港大經濟金融學院榮譽教授後，佢北上神州，獲中國投資公司委任為國際諮詢委員會顧問。不過到尋日為止，肥亨都一再強調，暫時沒有考慮過要搵份全職工作嚟做。
尋日係「解凍」後第二日，卓妮咁啱就喺中環一間酒店門外撞到佢，佢話依家嘅心情同一年前離開政府一樣，就係「無官一身輕」；見佢健步如飛，身形又清減咗，原來同佢做官嗰陣一百九十幾磅嘅高峰期比較，肥亨迄今足足減咗近二十磅，尋日上磅，最新體重剩番一百七十八磅左右，難怪佢話身體好咗好多，莫非肥亨打算東山復出，重返商界再戰江湖？
任職中投毋須審批
非也！肥亨話畀卓妮知，佢啱啱去北京出席完一個由前國務院副總理曾培炎主持嘅全球智庫峰會返港，順便攞埋中投份聘書。做得中投國際諮詢委員嘅香港人只有三個，除咗肥亨，仲有中大校長劉遵義及前證監會主席沈聯濤；肥亨做得呢個位，睇得出北大人都相當重用佢。不過，據聞肥亨接受委任前，特別同特首辦「報定案」，結果得到回覆，話個位非受薪，亦係非常設，佢又毋須插手公司日常運作，公司主要業務又喺香港，所以毋須獲得政府審批喎；肥亨喺政商界浸淫咁多年，每一步棋都諗得咁周到，真係服咗佢！
不過，卓妮最關心嘅，都係佢未來有乜打算，有冇考慮重返商界。肥亨就話暫時冇打算搵全職工作，會繼續做社會服務，最好忙得嚟生活冇壓力，所以佢閒來返教會做見證，返港大教書，甚至上電台為青年人發聲，近日做埋中投顧問，認真周身唔得閒。
青年人敗德感心酸
肥亨就「無官一身輕」，但肥亨大千金馬露明近日就升級做校長，佢創立教學中心JEMS擔任老師兼校長，教導小朋友正確嘅德育觀念，爸爸肥亨大表支持，話時下青年十幾歲人居然走去打劫、吸毒同援交，睇見都心酸，所以佢話青年人讀書之餘，首先要學做人，學吓家庭和社會嘅責任。不過露明瞓身創業要付出代價，暑假都行唔開陪家人去旅行，肥亨一於押後等埋囡囡，聖誕節至舉家歎世界去也。
卓妮