計功夫茶話齋，其實唔使搞咁多吹水嘢吖，目前有個產業，喺政府部門全力配合下，已經搞得有聲有色，發展前景肯定好過乜嘢醫療、環保產業多多聲，係乜？之唔係「排隊黨優勢產業」囉！

如果大家唔信排隊可以成為優勢產業，不妨搵日去油麻地西九龍入境辦事處望望，裏面人頭湧湧，原來當中好多都係排隊黨，佢哋晨早七時左右已經喺西九龍出生登記處開工，而且公然喺門外放張辦公枱，四出向市民派卡片拉生意。排隊黨明碼實價，講到明市民自己排隊唔係唔得，不過隨時要排到十一點至輪到辦手續，但經佢哋包保可以九點幾就走得！

更令人嘆為觀止嘅係，排隊黨仲向內地孕婦提供一條龍生仔服務。幫襯呢個服務，嚟港有食有住，甚至去醫院生仔都有專人同埋專車陪同，而且仲提供燉湯，幫手攞埋證件即日送返內地！嗱，今時今日，咁至係優良服務態度吖嘛。

唔係啩，排隊黨有冇咁神通廣大呀？唔係講笑，有位女士喺早上七時許抵達西九龍辦事處，本來排喺第二位置，但畀排隊黨阻一阻，排名一跌就跌到落去五十八號籌，原本九時左右便可辦手續，卒之要拖至近中午十二時先搞掂呀，陰功！

排隊黨當入境處職員無到，可以話夠晒囂張，仲要不斷安排預約客人插隊，令到奉公守法嘅輪候市民敢怒不敢言。排隊黨無法無天，擺明挑戰執法者，之但係就算有人向警方以及入境處職員投訴都冇用，兩個部門一味卸得就卸。

入境處話出生登記處喺六月一日至廿九日只係得三日出現額滿情況，服務已切合市民需求，並將兜售籌號個案交由警方跟進。至於警方又點呢？油麻地分區警署只係話接獲市民舉報已即時派員調查，但未有證據提出檢控。

唔係啩，排隊黨喺正門口兜客，擺晒枱做生意，要放蛇捉人有幾難？你試吓喺政府總部門口坐多陣吖，隨時出動幾車藍帽子抬走都有之呀！

事實上，本報早喺去年十月已經揭發排隊黨猖獗，當時入境處同埋警方都拍晒心口話會嚴正處理，點知至今情況唔只無改善，反而更加惡劣添。完全多得政府部門闊佬懶理，排隊黨至會咁橫行無忌。

不過，執法部門又唔係對所有嘢闊佬懶理嘅，佢哋執法一時一樣，最叻就係欺善怕惡。呢嗱，有個喺中環擺檔十六年嘅七十幾歲老擦鞋匠，咁多年來都唔肯領綜援，憑雙手自力更生，食環署居然要趕盡殺絕，連謀生用嘅鞋箱都要充公。話時話，阿伯只不過喺街角落幫人擦鞋，既冇阻街又冇影響公眾衞生，使唔使落咁重手呀？睇吓旺角行人專用區嘅易拉架一樣擺到成行成市，其實咪仲阻街，因乜事又唔見小販管理隊清場呢？

功夫茶忽發奇想，既然喺入境處門口擺枱做生意都得，咁如果有人喺禮賓府前面搭個辦事處，專賣貴價錦鯉，話唔定生意滔滔，仲可能做埋旅遊景點添，呢鋪真係想窮都難咯！