天下間哪裏來這許多心底話？譬如：老朽見到啲模水着look，只會目瞪口呆，口水狂嚥，哪會噴出四十多個「你好靚靚靚……正正正……」所以，心底話——通常係唔會向大眾講，或者「遲啲先講」（趕住上「瘦爸私家菜」，請包容）。

時代的巨輪是向前的（這話雖老土，但請理性分析），我們不能只緬懷過去米字旗下的文化，回歸已十二年了，背靠祖國，眼光要放遠些，要有……對，前瞻性！欲窮千里目，更上一層樓，不要老望着一池錦鯉喃喃自語：如果我係你就好喇，優哉游哉，快樂指數爆燈。所以話，冇咗心底話，乜事都睇化，明年禮賓府的杜鵑花必綻放得特別璀璨。

有個作者說得好：從一九一七年到二○○○年的八十三年裏，各國社會反覆折騰的經歷告訴我們甚麼？最大的教訓莫過於：不能因為在某時某地由於某個原因做成了某件事，就得出那個國家的制度真的最好的結論。就像不能因為阿炳拉二胡出色，就得出結論：所有人如果想拉好二胡必須先弄瞎眼睛。所以，老朽認為「舊夢不須記」，逝去的種種——理性與包容——昨日經已死！道理好簡單，觀念係會變。自從千億爭產案開審以來，風水師在老朽的理解中，其身份儼然係會將廁紙變銀紙的魔術師，仲要係金澄澄嘅金牛。

做得行政長官，切勿一本通書睇到老。包容是甚麼？唔同嘅人有唔同嘅睇法。老朽不是謀略家，是浪漫主義者，不過並非送人玫瑰，手留餘香，而係——好衰㗎！拆穿人：想做老公豬、日日中六合彩頭獎（包容與理性啲，咪掟蕉柴台）！