政府實施娛樂場所擴大禁煙範圍幾日，唔少煙民呱呱嘈，連部分巴士總站都唔畀食煙，煙民更加無立足之地。馬會主席陳祖澤（John）亦係資深煙民，佢自爆讀大學時因為想扮大人，膽粗粗加入煙民一族，自此想戒都戒唔甩。
John嘅煙齡大大話話有幾十年，但煙癮唔算深，每日只食半包，相當節制。有一日晏晝佢路經中環，講起擴大禁煙範圍對佢有乜影響，John輕描淡寫話冇所謂：「嗰度唔畀食咪唔食囉！」答得咁輕鬆，皆因佢有個吸煙「私竇」，嗰個就係佢屋企嘞。John話，屋企係佢嘅「最後堡壘」，就算全港禁晒煙，照樣可以匿埋屋企吸餐飽。
每個煙民背後都有一個吸煙的理由，John笑言當年因為貪玩，見到大學宿舍唔少同學叼住口煙，於是有樣學樣食埋一份，一食就上癮。John都曾經諗過戒煙，可惜因為冇借助戒煙用品，齋靠意志力，結果試咗幾次都係失敗，轉頭又心思思食番。