政府公布完授勳名單無耐，近日官場職位又有新調動，管理樹木管到畀人鬧到飛起嘅康文署署長周達明（Thomas），有傳好快會升做發展局常任秘書長，成為「好打得」局長林鄭月娥嘅左右手，而新聞處處長馮程淑儀則會接替Thomas平調康文署署長。至於新聞處處長個空缺，就結果由現時嘅教育局副秘書長黃偉綸接任。
Thomas同太太謝曼怡呢對夫妻檔總係「共同進退」，曾一齊去美國哈佛大學進修，又幾乎每次都係雙雙升職，好似Thomas在○六年八月由前環境運輸及工務局副秘書長升任做康文署署長前，謝曼怡又升做行政署署長，後來才平調任特首辦常秘。
今次Thomas爬番頭，升做發展局常任秘書長，不過睇番佢之前搞樹木管理成日畀人鬧，真係為佢個未來老闆擔心，喺度只有祝佢好運。
講開又講，教育局副秘書長（前稱「教統局副秘書長」）呢個位絕對可以稱得上係「升官位」，坐親呢個位嘅人都會升官，先有環境局局長邱騰華，繼而係新聞處處長馮程淑儀，依家又輪到坐緊呢個位嘅黃偉綸升做新聞處處長，升官之快，好似朱咪咪話齋：「快過搭飛機呀！」