香港賽馬會由下個馬季開始，將每季賽馬日由依家七十八日加到八十三日。本身唔賭馬嘅鄉議局副主席張學明好擔心，話馬迷逢賽馬日就喺投注站聚集，影響市容。點知佢畀黨友立法會議員陳克勤笑番轉頭，話賭馬嘅人主要分兩類，其中一類就係張學明呢類喎！
立法會民政事務委員會尋日傾增加賽馬日嘅建議，張學明話，依家每逢星期三同星期六賽馬日，有樣嘢會令佢幾煩，就係見到形形色色嘅賽馬愛好者喺投注站外，有啲就踎、有啲坐咗喺地下，雖然可以話係香港嘅特色，不過P:亦都會影響到市容喎！
陳克勤分享睇法時候話，佢自己都係唔賭博嘅，而且甚少入馬場，不過以佢有限度入馬場嘅經驗嚟睇，賭馬嘅人大致可以分為兩類，一類就係馬主級人物，即係社會上流、身光頸靚嗰啲，另一類就係踎喺路邊，好似張學明咁年紀比較大嘅人。仲話年輕人覺得賭馬唔潮，所以寧願賭波。佢此話一出，即時令到全場笑聲四起，難為張學明畀大家笑佢，話唔知佢踎喺邊度賭馬。