發叔身為鄉議局主席，梅窩居民對正生落戶有意見，發叔梗係撐居民啦，不過，事件過咗一個月，為正生另覓選址，一直未見曙光，正生書院企硬唔接受新選址，社會輿論又始終以同情正生為主流，喺形勢比人強下，發叔惟有腦袋急轉彎，嚟招回馬槍，嘗試返轉頭游說情緒開始平復落嚟嘅梅窩居民，睇吓有冇希望締造一幕大團圓結局。

蘇菲梁裏應外合？

其實，發叔有意調整策略，早已有迹可尋。上星期六，紡織界立法會議員梁劉柔芬（Sophie）失驚無神出動私伙豪華遊艇，接載「大舊」陳偉業等幾位立法會同僚，入芝麻灣探訪正生書院，Sophie總結行程時，為正生風波提咗個解決折衷方案，建議戒毒學生日後首階段照舊先入讀正生校舍，改善後再轉到第二階段嘅正規學校上課，相信居民會容易接受，大舊亦贊成方案。Sophie同發叔分屬經濟動力戰友，大舊喺新界西又一向同發叔有偈傾，大家估吓，佢哋事前有冇同發叔打招呼？Sophie呢個方案，話唔定就係發叔游說梅窩居民嘅腹稿。

消息指出，港府始終希望正生書院落戶梅窩，令風波得以圓滿解決，而發叔身邊嘅人，最近亦已經開始接觸梅窩居民，展開游說。不過，居民是否願意接受，仍然係未知之數，事關事件最初搞到咁僵，要居民一夜之間改變態度，談何容易！睇嚟發叔呢次要比錦綉大道使用權風波一役，花多兩倍耐性同精力至得嘞。

有政界人士分析，發叔促成正生落戶梅窩，換個角度睇，可算係無可選擇中嘅選擇，一嚟佢係行政會議成員，港府最高層落柯打要佢搞掂梅窩居民，佢好難Say NO；二嚟民主派議員打鑼打鼓聯署撐正生遷校，學發叔話齋，擺明想搭政治順風車攞着數；如果呢個時候發叔唔親自出手擺平事件，第日梅窩居民受壓之下先至低頭，咪畀民主派攞晒彩？所以，無論條數點計，發叔呢次都要向梅窩居民曉以大義㗎嘞。