港澳兩地嘅特首選舉最近又被炒熱，尋日喺一個政黨嘅酒會上，賭王何鴻燊公開點評兩地特首候選人。除猛讚澳門唯一候選人崔世安「別無他選」外，又開賭盤，以賠率十賠一買唐唐跑出香港嘅比賽；相反形容行會召集人梁振英（CY）為人「古板啲」，至於財政司司長曾俊華，佢就一句都無提。
續撐崔世安掌澳門
賭王一講到澳門，一如既往力撐崔世安：「崔世安啱晒，最適合做澳門特首。你要記住，做特首要斷六親，咁至做得㗎！」賭王仲用「別無他選」來形容崔世安做澳門特首，加強力撐力度，擺明對今日發表政綱嘅崔世安投下百分百嘅信任票。
睇好唐唐笑CY古板
而香港特區三名疑似特首候選人，包括唐唐、CY同鬍鬚曾，尋日亦喺酒會同場出現，難得嘅係賭王即場開盤受注。大家問燊哥，邊個最適合做特首？佢答：「我贊成最熱門嗰個！」然後佢多次暗示指唐唐夠熟手，夠穩陣：「佢熟晒啦，乜嘢政府部門都做過，繁榮穩定可以繼續！」
講到興起，燊哥好豪氣咁話：「睹吓吖，我十對一，你賭幾多錢都殺你！」
講到CY，燊哥就笑笑口講：「嗰個就古板啲。」又話最近豬流感，少出街食飯，暗示CY無搵過佢傾偈。至於做特首係咪要識上海話，燊哥話：「最緊要識廣東話，係香港人，喺香港大！」
我哋想追問唐唐點回應燊哥，佢沉默是金，祝酒儀式後迅速離開。至於CY就不以為然咁話，過去廿年來，撐佢做特首嘅大不乏人，「好似安老咁」。CY口中嘅安老，就係已故全國政協副主席安子介。不過，當卓妮問佢點睇鬍鬚曾參選，CY竟然一臉惘然反問話：「邊個？」
酒會除高官雲集，各大地產商都有出席，除咗燊哥，仲有世茂集團董事長許榮茂，「純官」鄭家純無到，派頭馬梁志堅出席，佢哋齊撐樓市，話下半年樓價仲有得升。梁志堅話，收到立法會傳召出席梁展文事件聆訊，要諮詢法律意見，先至決定係咪出席。另外，福建中學成功承辦基督教臻美黃乾亨小學暨初中學校辦學權，現場好多人恭賀身為校董會主席嘅盧文端及校董楊孫西，楊孫西話：「辦學最緊要有實力！」
卓妮