七十三歲的杜四妹兩年前證實患上肺癌，接受化療與電療後病情仍未好轉，「肺入面嘅腫瘤大過隻雞蛋，日日壓住我，好痛，好痛！」杜婆婆育有三名子女，但俱屬低收入一族，多年來與丈夫靠綜援金維生。傳統治療未能令婆婆病情好轉，醫生建議服用每月需費一萬八千多元的新標靶藥物，子女雖生活艱難，但仍傾盡所有為母親治病。

「唔通窮人冇資格長命啲？」

「食咗隻藥真係好咗好多，但係成兩萬蚊一個月，啲仔女邊有咁多錢再買，依家冇藥食，日日好似等死咁！」婆婆以無比落寞的語調說。

目睹母親「有病冇錢醫」且日漸瘦弱，吳先生坦言有錐心之痛，「我做份保安，賺得嗰幾千蚊，仲有兩個仔女要養，唔通真係要去借貴利醫阿媽？」吳指現時每次覆診，醫生為母親處方的仍然是同一種標靶藥，家人因為再無法籌錢買藥，令杜婆婆已斷藥數月。

對於醫管局拒絕資助具藥效藥物，吳先生愈說愈火，「我問過醫管局同社署，個個都話幫唔到我，明明有藥都買唔到，唔通窮人就冇資格長命啲？點解香港會搞成咁！」

香港防癆心臟及胸肺協會名譽顧問醫生陳兆倫表示，治療肺癌標靶藥物必須按照醫生規定服藥，一旦停藥後果堪虞，「啲癌細胞可能會喺停藥嗰陣反彈，令啲藥控制唔到個病，或者會形成抗藥性，咁個病人就好危險！」

醫局向錢看 拒堵塞漏洞

「醫管局根本就唔係醫人，乜嘢都係睇錢份上！」香港社區組織協會主任何喜華炮轟政府為公共醫療投放資源不足，加上藥物名冊奉行「用者自付」政策，令基層市民苦陷「冇錢冇得醫」困局。

醫學界立法會議員梁家騮直指目下醫療制度未能切合病人實際需要，所謂的安全網早已「穿窿」，「好似黏多糖症咁，一年藥費可能要幾百萬，唔係人人畀得起！」梁指生命無法斗量，認為醫管局須檢討醫療制度，為有需要病人提供藥物資助。

社會福利署發言人表示，在醫管局現有藥物名冊制度下，綜援受助人如服用通用或專用藥物，將可獲豁免費用；至於非通用或專用藥物（即並未納入藥物名冊之藥物），醫管局與該署均未能提供資助。

至於醫管局方面，本報於五月二十日向該局查詢上述個案，惟截稿前仍未獲回覆。

新藥未納名冊 資助多掣肘

撒瑪利亞基金成立於一九五○年，旨在向有需要人士提供醫療項目資助，現由醫管局負責管理。醫管局推出藥物名冊時，曾承諾病人如有需要，可透過撒瑪利亞基金解決自費藥物的購買問題，亦即所謂「沒有人會因經濟問題而得不到適當醫療服務」的「安全網」。在現行政策下，經濟有困難的病人通過醫務社工審查後，可向基金申請在公立醫院或診所所需之自費藥物或醫療開支費用。

不過，有醫務社工透露，過去仍有不少病人因無法申請基金而未能購買自費藥物，「基金只係資助藥物名冊入面嘅自費藥，而且仲係有限度資助，好多未入名冊嘅新藥就算有效都幫唔到，見到啲病人係咁等死都好無奈！」

■記者 徐曉敏