窩山居民三十多年來一直借用一幢私樓的升降機前往窩打老道一帶，不過，在○四年九月，大廈法團突以保險、管理、保安等因素為由，拒絕對外開放升降機，居民自始便靠撐樓梯或長命斜出入。「有專線小巴都冇用，等車加埋塞車仲嘥時間，總之出入唔係撐一百二十八級樓梯，就要行大斜路！」張先生指年輕人有氣有力尚可應付，長者與傷殘人士卻有心無力。
「咁多年都冇回音」
居於窩山四十多年的黎伯不滿政府未有急市民所急，「種樹搞綠化就好快，起升降機咁多年都冇回音。成日都有老人家喺條樓梯仆親，呢啲都係社區基本設施啫，有乜理由唔畀我哋？」黎伯指區內將有多項發展計劃，人流勢必增加，對升降機的需求更大，「以前呢度冇咁多學生，依家多咗好多。遲啲有新樓入伙，又話有新賓館落成，到時仲多人。」
協助居民爭取多年的當區區議員伍精民指出，窩山每日的行人流量逾九千九百人次，惟當局仍指尚未符合興建升降機要求，但又拒絕公開有關準則，「問佢哋（運輸署）幾多先叫夠（人流）就答唔出！」伍促當局公開審批準則，並正視居民訴求。
「成件事好明顯，就係運輸署之前可能冇乜規劃，淨係用處理危機方式回應，邊度有人嘈就整邊度，仲要咁多年都冇回音，難怪啲居民會有怨氣！」立法會交通事務委員會委員王國興認為，事件與運輸署未有就裝設自動扶梯及升降機系統作出全面規劃有關，評審準則及優先次序等亦未有明確公布，他促當局盡快落實興建時間表。
香港專業教育學院（青衣）建造工程系署理首席講師黃漢平指出，依山興建升降機存有難度，而位置、人流、需求、建築成本、保養及維修等問題皆為考慮條件。一般情況下，依山興建升降機工程估計需時約一年半，但實際時間與費用仍需視乎地形、斜坡高度等因素而定。
拒絕公開人流準則
對於居民一直要求公布的興建升降機人流準則，運輸署發言人仍然未有提供，只重申自○四年起與窩山居民代表商議設置升降機建議後，曾三度進行人流量調查，並審視窩山交通及發展情況後，發現並未完全符合「裝設自動扶梯連接系統/升降機系統的全港性研究」的篩選準則，預計下半年將訂立一套評審制度，屆時會就有關建議再作評審。
■記者 莫麗珊