有幾牙煙呢，請問？講出嚟怕且嚇到你腳仔軟，康文署轄下港島東游泳池嘅救生員本來已經唔夠人手，應該要有七個，實際只得四個，最恐怖嘅係，當救生員要請假嘅時候，外判公司居然會求求其其是是但但搵一個完全冇拯溺同急救資格嘅職員頂更！

話說上月十三日，四個救生員之中有一個因為急事一定要請假離開，外判公司唔理泳客安全，搵咗一個平時喺收費處負責「暢錢」嘅職員濫竽充數。喂，救生員好大責任㗎，如果有人遇溺，隨時一個動作就決定生死，你搵個「暢錢」嘅人去扮救生員，同一個唔識救火嘅人去扮消防員有乜分別？

由於事態嚴重，有泳客忍唔住向康文署投訴。大家估唔估到署方點講吖嗱？佢哋話喎，當日係就係有一位場地主任暫時頂替急救站工作，不過，時間好短啫，只係二十五分鐘，後來搵到另一位救生員頂替。

康文署講到輕描淡寫，可惜吖，呢個大話好快就被踢爆。當日在場嘅救生員阿恆講出一個殘酷嘅真相，全日直至泳館關門根本就未見過任何救生員到場頂更！

呢嗱嗱嗱，又係外判制度出問題。據阿恆所講，有人收到康文署投訴後，要求當日三名當值救生員統一口徑承認有另一救生員頂更，唔排除康文署都做咗一個被騙嘅傻仔。而充滿正義感嘅阿恆，由於唔想講大話，更加唔想危害泳客安全，所以話如果康文署唔處理，不排除報警求助。難怪立法會議員陳偉業敦促康文署盡快改善問題，一來要求徹查頂更事件，二來要求取消外判制度。

計功夫茶話齋，假如真係有人要求救生員統一口徑，確係罪大惡極，證明成個監管機制完全崩潰。至於外判制度咯喎，講到口臭啦，政府次次將工作外判，少不免連責任都判埋出去，一於冇眼屎乾淨盲，話之你死。所以咯喎，取消外判制度係啱嘅。

唉，公眾泳池確係愈嚟愈牙煙，上個月之嘛，兩個小兄弟冇大人陪同去游水，泳池職員居然任得佢哋入去，結果十歲細佬遇溺死亡。睇番數據，○六年全港公眾泳池發生嘅意外總數係一千八百幾宗，○八年急升近四成，去到二千五百幾宗，即係平均每日有七宗意外。

意外頻生同救生員人手不足息息相關。喺外國，一個泳池閒閒地有四至六個救生員。香港咯喎，康文署竟然沿用二十六年前嘅編制，標準泳池只有三個救生員，習泳池同埋訓練池仲得人驚，只係有一個救生員當值。人手已經唔夠嘞，家陣淪落到搵個唔識拯溺嘅茂里頂更，絕對係嚴重危害泳客安全！

點樣可以改善呢？不如咁，搵人將康文署署長周達明掟落水，再搵個唔識拯溺嘅茂里去救佢，等佢死過翻生咯喎，可能有機會由於感同身受而改善泳池質素啩。