啱啱做咗教統會主席嘅鄭慕智（Moses）可以點推動香港嘅教育政策大家都未知，不過Moses嘅家庭教育就做得好唔錯，各位家長應該參考吓。Moses大女慧恩（Vena）上個月考到美國律師執業資格，成家人陪佢去紐約領證書，仲順便旅行慶祝添。Vena唔單止有美國律師牌，喺香港同英國都係執業律師，佢平時係處理開跨國企業嘅商業糾紛案件，睇嚟就快青出於藍，出色過本身都係律師嘅爸爸。
Moses一家人尋日喺銅鑼灣出席一個活動，講起Vena咁叻，Moses話平時無畀壓力要Vena繼承衣鉢，最多都係等佢知道律師本身係做啲乜。究竟Moses教女有乜秘訣？Moses話，佢從來都無乜點教Vena讀書，原因係已經幫個女交咗學費，Vena有咩學業問題，都應該自己問老師！不過Moses都有招教女絕招嘅，就係要佢哋明白，讀書係為自己，而唔係為氹父母開心。
Moses嘅細女慧慈仲讀緊書，讀嘅係生物化學，Moses都係嗰句，個女有興趣，由佢自己決定就得嘞。